សែលកាត ចូលរួមទិវាជាតិការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET Day) លើកទី២ ដើម្បីបន្តលើកកំពស់លើវិស័យអប់រំ និងបណ្តុះបណ្តាលលើវជ្ជាជីវៈ 

0
128

ភ្នំពេញ ៖ ក្រុមហ៊ុនសែលកាត ចូលរួមទិវាជាតិការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET Day) លើកទី២ ធ្វើឡើងក្រោមប្រធានបទ «TVET អាចធ្វើបាន» រយៈពេល២ថ្ងៃ ចាប់ពីថ្ងៃទី១៥-១៦ ខែមិថុនា ឆ្នាំ២០១៩ នៅអគារពិព័រណ៍ពាណិជ្ជកម្មកោះពេជ្រ។
ក្នុងកម្មវិធីនេះផងដែរ គឺមានការចូលរួមឧបត្ថម្ភធំពីក្រុមហ៊ុនសែលកាត ដែលជាក្រុមហ៊ុនរបស់ជនជាតិខ្មែរតែមួយគត់ ដែលតែងតែចូលរួមគាំទ្រកម្មវិធីដើម្បីបន្តលើកកំពស់លើវិស័យអប់រំ និងបណ្តុះបណ្តាលលើវជ្ជាជីវៈ។
ឯកឧត្តម បណ្ឌិត ពេជ សោភ័ណ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការរីកចម្រើនបច្ចេកវិទ្យាថ្មីៗក្នុងដំណាក់កាលបដិវត្តឧស្សាហកម្ម៤.០នេះ នឹងធ្វើឱ្យបាត់បង់ការងារមួយចំនួន តែក៏បង្កើតឱ្យមានការងារថ្មីៗផ្សេងទៀត ដែលតម្រូវឱ្យពលរដ្ឋគ្រប់គ្នាចេះនូវជំនាញបច្ចេកទេស និងវិជ្ជាជីវះ។ ហើយការកើតមានឡើងនូវបដិវត្តឧស្សាហកម្មទី៤ ដោយសារការរីកចម្រើនបច្ចេកវិទ្យាថ្មីយ៉ាងឆាប់រហ័ស កំពុងជះឥទ្ធិពលឱ្យមានការផ្លាស់ប្តូរយ៉ាងខ្លាំងនូវរបៀបរបបប្រតិបត្តិការធុរកិច្ច និងការបំពេញការងារ និងតម្រូវការជំនាញគ្រប់ប្រភេទ។ សូម្បីតែនៅកម្ពុជាបច្ចុប្បន្ននេះ ក៏មានការផ្លាស់ប្តូរដែលបណ្តាលមកពីការរីកចម្រើនផ្នែកបច្ចេកវិទ្យានេះដែរ ដូចជាការផ្តល់សេវារថយន្តតាក់ស៊ី សេវាធនាគារ-ហិរញ្ញវត្ថុ ការទិញ-លក់ទំនិញ ឬការកក់សណ្ឋាគារ និងសំបុត្រយន្តហោះជាដើម។ កត្តានេះនាំឱ្យមានការព្រួយបារម្ភអំពីការបាត់បង់ការងារ ព្រមទាំងការបង្វែទុនវិនិយោគត្រលប់ទៅប្រទេសអភិវឌ្ឍដែលជាប្រភពដើមនៃទុនវិញ ដោយសារការប្រើប្រាស់ស្វ័យប្រវត្តិកម្ម រ៉ូបូត និងបញ្ញានិម្មិតជំនួសឱ្យកម្លាំងពលកម្ម និងបញ្ញាមនុស្ស។ ជាការពិតហើយថា នឹងមានការងារខ្លះនឹងត្រូវបានបំផ្លាញ និងបាត់បង់ ពេលដែលក្រុមហ៊ុនចាប់យកបច្ចេកវិទ្យាថ្មីទាំងនេះ មកប្រើប្រាស់ជាបន្តបន្ទាប់ ក៏ប៉ុន្តែបច្ចេកវិទ្យាថ្មីទាំងនេះ ក៏នឹងចូលរួមចំណែកផងដែរក្នុងការបង្កើតការងារថ្មីៗកាន់តែល្អ មានផលិតភាព និងផ្តល់ប្រាក់ឈ្នួលកាន់តែខ្ពស់ ដូចនៅក្នុងប្រវត្តិសាស្រ្តនៃបដិវត្តន៍ឧស្សាហកម្មនានា ក្នុងពេលកន្លងមក។ ក្នុងបរិបទដែលខឿនសេដ្ឋកិច្ច បច្ចេកវិទ្យា និងពិភពការងារមានការប្រែប្រួលយ៉ាងឆាប់រហ័ស។ ដូច្នេះកម្លាំងពលកម្មទាំងអស់ត្រូវតែត្រៀមខ្លួនជានិច្ច ដើម្បីរត់ដេញតាម ហើយអ្នកដែលនឹងឈានទៅទទួលបានជោគជ័យ គឺអ្នកដែលផ្តួចផ្តើមដោយខ្លួនឯងផ្ទាល់ ក្នុងការយកចិត្តទុកដាក់លើការអភិវឌ្ឍថ្មីៗ ដែលកំពុងលេចរូបរាងឡើង និងអនុវត្តការសិក្សាពេញមួយជីវិត ដើម្បីឈានទៅចាប់យក និងធ្វើបច្ចុប្បន្នកម្មចំណេះដឹង និងជំនាញចាំបាច់ជាបន្តបន្ទាប់ឥតដាច់ ដើម្បីអាចឆ្លើយតបទាន់ការប្រែប្រួលដ៏ឆាប់រហ័សនៅក្នុងទីផ្សារការងារ។
ឯកឧត្តម បានបន្តថា ដើម្បីចូលរួមអនុវត្តឱ្យសម្រេចជោគជ័យនូវអាទិភាពខាងលើនេះ ក្រសួងការងារ និងបណ្តុះបណ្តាលវិជ្ជាជីវៈ បានដាក់ចេញនូវផែនការយុទ្ធសាស្ត្រអភិវឌ្ឍវិស័យការងារ និងបណ្តុះបណ្តាលវិជ្ជាជីវៈ ឆ្នាំ២០១៩-២០២៣ ដែលបានកំណត់ «ការធ្វើទំនើបកម្មប្រព័ន្ធអប់រំបណ្តុះបណ្តាល បច្ចេកទេស និងវិជ្ជាជីវៈ» ជាយុទ្ធសាស្ត្រគន្លឹះមួយ ដើម្បីកសាងបាននូវកម្លាំងពលកម្មដែលមានជំនាញវិជ្ជាជីវៈច្បាស់លាស់ គំនិតឆ្នៃប្រឌិត និងភាពប្រកួតប្រជែងខ្ពស់ និងសម្រេចឱ្យបាននូវគោលដៅ «យុវជនម្នាក់មានជំនាញមួយយ៉ាងតិចប្រចំាជីវិត»។ រាជរដ្ឋាភិបាលបានបង្កើតក្របខណ្ឌគុណវុឌ្ឍិជាតិកម្ពុជា ដាក់ឱ្យអនុវត្តកម្មវិធីបណ្ដុះបណ្ដាលថ្មីផ្អែកលើសមត្ថភាពសម្រាប់គុណវុឌ្ឍិជាតិកម្រិត ១, ២, ៣ និង ៤ សម្រាប់ ៥វិស័យ រួមមាន សំណង់ មេកានិក ធុរកិច្ច/ICT អគ្គិសនី និងកម្មន្តសាល ព្រមទាំងរៀបចំដាក់ឱ្យដំណើរការនូវប្រព័ន្ធធ្វើតេស្តសមត្ថភាព និងផ្តល់វិញ្ញាបនបត្រទទួលស្គាល់ការសិក្សាពីមុន ដែលនឹងធ្វើសមាហរណកម្មអ្នកបានទទួលការបណ្តុះបណ្តាលគ្រប់ប្រភេទទាំងមុន និងក្រោយចូលធ្វើការងារ និងទាំងក្នុងប្រព័ន្ធ និងក្រៅប្រព័ន្ធ៕

មតិ