មានរឿងអ្វីបានជាបុរសម្នាក់យកគ្រាប់កាំភ្លើងបាចក្នុងហាងកាត់សក់សំញ៉ែងកាំភ្លើងគម្រាមជាងកាត់សក់ដល់ក្នុងហាងនៅបឹងត្របែក

ភ្នំពេញ ៖ នាព្រឹកថ្ងៃទី៣ ខែឧសភា ឆ្នាំ២០២៣ គេបានបង្ហោះវីដេអូឃ្លីប ចេញពី កាម៉េរា សុវត្ថិភាព ជិត៦នាទី ឃើញពីសកម្មភាពរបស់បុរសម្នាក់ ហាក់ដូចជា ថ្លើមធំ ចរិកមានតែ អញ កោងកាច ដើរចូលហាងកាត់សក់ ស្រែកឡូឡា ដោយប្រើគ្រាប់កាំភ្លើង បោះចាចក្នុងហាង សម្លុត បំបាត់ ជាងកាត់សក់ រហូតដល់លើកដៃសំពះ ហើយភ្ញៀវអ្នកមកកាត់សក់ ក៏ភ័យ កាត់សក់មិនទាន់ហើយផង ក៏ចាកចេញទាំងព្រលឹងចុងសក់ ។

នៅក្នុង ផេកឈ្មោះ ( អេសភីខេ ញូ ) បានបង្ហោះថា,
កាចសាហាវមែន ! អ្នកបេីកទ្បានលុចសុីស570 ស្លាកលេខ ភ្នំពេញ 2AG-2222 មកហាងកាត់សក់ និយាយទ្បូទ្បាខ្លាំងៗខឹង.គេប្រាប់ពីរបីម៉ាត់ដេីរទៅយកគ្រាប់កាំភ្លេីងមកបាចនៅក្នុងហាងលេីកអាវសំញ៉ែងកាំភ្លេីងនៅចង្កេះនិយាយគំរាមបាញ់ និងនិយាយគំរាមទះកំភ្លៀងជាងកាត់សក់ ។

ហេតុការណ៍នេះ កើតឡើងនៅផ្លូវលូរ១០៥បឹងត្របែក សង្កាត់បឹងត្របែក ខណ្ឌចំកាមន រាជធានីភ្នំពេញ នា វេលាម៉ោង ១២.១០នាទីថ្ងៃត្រង់ ថ្ងៃ ទី២ ខែឧសភា ឆ្នាំ ២០២៣។

ផេក ( អេសភីខេ ញូ ) បានត្រឹមតែបង្ហោះ វីដេអូឃ្លីប ប៉ុន្តែ មិនធ្វើការអធិប្បាយ រៀបរាប់ពីសាច់រឿងនេះទេ ដូច្នេះសូមសមត្ថកិច្ចមូលដ្ឋាន សមត្ថកិច្ចជំនាញ ពាក់ព័ន្ធ ស៊ើបអង្កេត ស្រាវជ្រាវ ក្នុងរឿងនេះផង ខណៈសមត្ថកិច្ចមូលដ្ឋានថា អត់បានដឹង ដោយសារម្ចាស់ទីតាំងអត់បានប្តឹង ??? ។

ក្រោយមកសមត្ថកិច្ចមូលដ្ឋានបាន ឆ្លើយប្រាប់ថា, បានឃើញវីដេអូហើយ ចាំស្រាវជ្រាវ ដោយសារមានស្លាកលេខឡាន ៕