រាជធានីភ្នំពេញ ៖ បើទោះបីជាគណៈអភិបាលរាជធានីភ្នំពេញដាក់កំហិតអោយអភិបាលខណ្ឌទាំង១៤ ទប់ស្កាត់ទីតាំងបើកល្បែងស៊ីសងយ៉ាងណាក៏ដោយ ក៏ផ្ទះ២ល្វែងស្ថិតតាមបណ្តោយផ្លូវ១០៩ សង្កាត់វាលវង់ ខណ្ឌ៧មករា នៅតែអាចបើកដំណើរការយ៉ាងរលូន ហាក់គ្មានញញឹតនិងបទបញ្ជារបស់អភិបាលរាជធានីអ្វីបន្តិចសោះ រឺមួយអាចសែនត្រូវរ៉ូវជាមួយមូលដ្ឋានខណ្ឌហើយមើលទៅ
សូមបញ្ជាក់ថា ទីតាំងបើកល្បែងស៊ីសងខាងលើនេះ ត្រូវបានគេប្រាប់អោយដឹងថា បើកជាលក្ខណៈដូចកាស៊ីណូអញ្ចឹង មានល្បែងគ្រប់ប្រភេទ ហើយក៏មានមនុស្សចេញចូលគគ្រឹកគគ្រេងទាំងថ្ងៃ យប់ យ៉ាងអណាធិបតេយ្យ តែងាកមកមើលអាជ្ញាធរសង្កាត់ ក៏ដូចជាខណ្ឌ៧មករា ហាក់គ្មានវិធានការក្នុងការបង្ក្រាបសោះ ។
សូមរំលឹកថា កន្លងមក លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក ស ថេត អគ្គស្នងការរងនិងជាស្នងការនគរបាលរាជធានីភ្នំពេញ បានដាក់បទបញ្ជានិងព្រមានចាត់វិធានការក្តៅទៅលើមន្ត្រីក្រោមឱវាទ អធិការ ក្រុង-ស្រុក និងនាយប៉ុស្តិ៍រដ្ឋបាលឃុំ-សង្កាត់នានា ដែលទុកបណ្តោយឲ្យមានសកម្មភាពល្បែងស៊ីសងគ្រប់ប្រភេទខុសច្បាប់។
ប្រជាពលរដ្ឋដែលស្អប់ល្បែងស៊ីសង នឹងរង់ចាំមើលលោក អភិបាលខណ្ឌ៧មករា ដែលទើបប្តូរមកថ្មី លោក ថេង សុថុល អាចមានវិធានការចំពោះទីតាំងខាងលើនេះរឺបណ្តោយអោយទីតាំងខាងលើនេះបើកយ៉ាងរំភើយបន្តទៀត…៕
Discussion about this post